Autor: ccc39382d9

Ao redor duns 40 establecementos e negocios do Xeodestino Ancares Terras de Burón recibiron xa o distintivo que os acredita como membros oficiais da iniciativa da ‘Cociña de Ancares Terras de Burón’.  Esta iniciativa abrangue os aloxamentos turísticos que contan cunha despensa onde teñen produtos locais a disposición dos visitantes;  a restaurantes e casas de comidas que ofrecen pratos elaborados con produtos de proximidade e a partir de receitas tradicionais da zona; e tamén aos obradoiros e puntos de venda dos produtores de alimentos do Xeodestino Ancares Terras de Burón.

Aquela veciñanza e visitantes que aposten por hospedarse nun destes negocios hostaleiros e levar algún destes artigos ou compralos nunha tenda que conte con este selo na súa entrada, saberán que van consumir un produto de proximidade e con todas as garantías de calidade, ao tempo que colaboran co desenvolvemento da economía local do territorio. Así o explica Fe Álvarez, xerente do GDR Montes e Vales Orientais. “O noso obxectivo coa ‘Cociña de Ancares Terras de Burón’ é potenciar a economía local buscando tender pontes entre produtores e establecementos para que os alimentos e bebidas que se producen no noso territorio se consuman tamén aquí e para a que a nosa gastronomía actúe como unha fantástica embaixadora turística do xeodestino”, salienta.

Un recuncho especial e saboroso

Un total de 15 establecementos xa teñen preparado un recuncho especial nas súas instalacións dedicado á ‘Despensa de Ancares Terras de Burón’, onde os seus hóspedes e visitantes poderán atopar e mercar distintos produtos pertencentes a dez produtores que xa se adheriron tamén a este proxecto. Os establecementos que xa recibiron o selo que os identifica como participantes son o Complexo O Piñeiral da Fonsagrada; Apartamentos Sons do Eo, bar O Recuncho d’Vane e A Marronda, en Baleira; Antollos do César, en Baralla; Hotel Os Ancares e Casa do Bico, en Becerreá; Casa O Crego e Cabañas de Ancares, en Cervantes; a Casa Grande de Láncara; Casa Suarna, Caserío Meiroi e Supermercados Embutidos Suarna, en Navia de Suarna; Casa Chaín, en Pol; e o Restaurante O Cebreiro, en Pedrafita de Cebreiro.

Mentres, os produtores que xa están certificados e son participantes de pleno dereito neste clube de produto turístico son a Cooperativa A Carqueixa, a Asociación de Gandeiros da Fonsagrada (Asgafón), Mel Casa Príncipe, Mel ToxalRiba, O Retiro, Cervexas Píntega, Embutidos Suarna, Adega Sidrón, Ribeiregas e Mel Outurelos.

Estas últimas semanas, produtores e establecementos fixeron un esforzo para que estes recunchos xa estean dispoñibles nesta Semana Santa, unha das temporadas importantes a nivel turístico na zona, xa que son uns días nos que centos de visitantes apostan polos Ancares e as Terras de Burón para pasar o seu tempo de vacacións.

Casas de comidas onde desfrutar da gastronomía local

Na entrada dos restaurantes e casas de comidas dos 14 concellos nos que traballa o GDR Montes e Vales Orientais, xa se comezan a ver pendurados os selos de ‘Cociña de Ancares Terras De Burón’.

A día de hoxe son 18 os restaurantes e casas de comidas certificados. En Baleira, A Marronda, O Recuncho D’Vane, O Neireo e os Apartamentos Sons do Eo. Aqueles que se acheguen a Navia de Suarna poderán desfrutar das receitas certificadas na Casa de Chao, o Caserío Meiroi, o Café Bar Xegunde, no Restaurante A Escola e no Mesón Aarau. Na Fonsagrada certificáronse O Piñeiral e o Mesón Catro Ventos; en Becerreá os restaurantes Rivera e Boavista; mentres que A Lareira (As Nogais), Casa Sidrón (Negueira de Muñiz), Fonda Zarralleiro (Baralla), o Restaurante O Cebreiro (Pedrafita do Cebreiro) e a Casa Cazoleiro (Meira) completan un listado que está aberto a novas incorporacións.

Turismo sostible

Esta proposta tamén cumpre cunha das liñas de actuación máis importantes do GDR Montes e Vales Orientais, que non é outra que apostar por un turismo sostible. É importante recordar neste punto que o Xeodestino Ancares Terras de Burón foi o primeiro destino de ecoturismo da provincia de Lugo e o segundo de Galicia. “Buscamos un turismo responsable, que non dane os recursos naturais que temos, que respecte a biodeversidade do noso territorio e tamén axude a que medre a economía local”, conclúe Fe Álvarez.

A primeira Ruta dos Fornos de Pol saldouse cun auténtico éxito de participación, xa que reuniu o pasado domingo 3 de marzo a 120 sendeiristas chegados de toda a provincia de Lugo que desfrutaron dun agradable paseo, recibiron unhas nocións básicas sobre o funcionamento dos fornos e como se fan o pan e as empanadas neles e ademais puideron degustar uns petiscos e gozar de música en cada parada. Organizada pola Asociación de Mulleres Rurais Olvido e Roteiros de Pol, contou coa colaboración do Grupo de Desenvolvemento Rural Montes e Vales Orientais, a Deputación de Lugo e o Concello de Pol. “Foi un éxito total porque tíñamos pensado contar con 80 persoas e ao final foron 120. Tivemos que facer máis tazas das que prevéramos e tamén máis folletos explicativos sobre os lugares que atravesamos”, salienta Lourdes Abuín, directiva do colectivo organizador e xerente da Casa Chaín de Pol.

Esta primeira ruta contou cunha distancia de 10 quilómetros e fixo parada en seis fornos. Arrincou ás dez da maña da Capela das Neves, que fixo honra ao seu nome “porque atopamos a capela nevada e alí foi onde tomamos un café e almorzamos para quentar un pouco o corpo”, rememora Abuín. O percorrido era dunha intensidade media-baixa polo que estaba dirixida a todos os públicos. De feito, destacou a participación de dúas nenas de cinco e sete anos de idade.

A pesar das inclemencias meteorolóxicas, a xente respondeu: “Tíñamos medo a que, como estaba chovendo e mesmo nevando, non viñeran, pero a xente veu con calzado e roupa axeitada, paraugas e outros complementos. Ademais contábamos cun par de coches de apoio”. Logo do almorzo dirixíronse ao forno de Bernabel, que era a primeira parada. Posteriormente visitaron os de Labrada, Pásaro, Neira, Mirón e o da Casa Chaín, onde remataba a ruta. “En cada sitio había xa preparado un petisco salvo nun onde había liscos, que se teñen que facer e comer no momento. No último tomamos o postre, que era un doce de biscoito de noces e brownie, cun café, fixemos unha foto de familia e demos por rematada esta primeira ruta dos fornos”, explica. Tamén degustaron empanada, bolas de queixo, chourizo e carne ao forno. Foron en total unhas 6 horas de andaina, aprendizaxe e comida que tamén estiveron acompañadas de música. “Estivo con nós o grupo Axeixo e en cada forno tocaba unhas pezas”.

Participantes de todas as idades

Os participantes eran veciños dos arredores. “Veu un bus cheo de Lugo e logo tivemos xente que veu pola súa conta da Pontenova, Meira, Pol,… Había persoas de todas as idades, desde esas dúas nenas pequenas a xente maior, duns 70 anos e sobre todo xente de mediana idade e moitas parellas de entre 40 e 50 anos”, lembra Lourdes Abuín. En canto ao que máis lles chamou a atención aos participantes, a xerente e propietaria de Casa Chain destaca que “pareceulles moi interesante a idea de facer unha ruta de sendeirismo polo monte e acabar nun forno comendo chourizo ou outras cousas e logo volver a botar a andar. E tamén preguntaban moito polo funcionamento dos fornos, a colocación das chemineas e os diferentes fornos tradicionais que hai. Creo que lles gustou e que valoraran o ben organizado que estaba todo”, salienta.

Obxectivo tamén turístico

Esta ruta e as que pensan facer no futuro teñen un dobre obxectivo. “Por un lado queremos resaltar os fornos e animar á xente a que os conserve e se volvan utilizar, porque sabemos que nas aldeas aínda quedan moitos en desuso e cada vez queda menos xente que coza neles. O obxectivo é poñer en valor esas construcións e que non se perdan, pero tamén entregamos uns folletos explicativos da etnografía dos lugares polos que pasamos, xa que tamén queremos que teña un fin turístico e que se vexa a riqueza dos pobos nos que están os fornos”, destaca.

A Asociación de Mulleres Rurais Olvido e Roteiros de Pol xa traballa en novas rutas. “Queremos que isto teña continuidade e visitar máis fornos. Nesta ocasión tocamos tres parroquias, pero xa estamos falando con persoas doutras que teñen forno e cocen. Seguramente en poucas semanas levaremos a cabo a segunda ruta”, avanza. Coa primeira andaina colaboraron a Área de Cultura da Vicepresidencia da Deputación, “que nos axudou coa música”, o Concello de Pol, “que se encargou das tazas que entregamos a cada participante para beber nos fornos”, e desde o GDR Montes e Vales Orientais, a través do proxecto ‘Cociña de Ancares Terras de Burón’ démoslle visibilidade á iniciativa e encargámonos da impresión dos folletos explicativos sobre a ruta que se repartiron.

Cursos para aprender a facer pan

A aposta de Lourdes Abuín pola recuperación dos fornos tradicionais é total, xa que no seu propio establecemento turístico organiza desde hai uns meses cursos de amasado e de facer pan. “Temos cursos unha ou dúas veces ao mes e están tendo moi boa acollida. Empezamos o ano pasado e xa imos polo quinto. Facemos un curso que engloba todo o proceso, empezando ás dez da mañá co amasado e logo acabando aló polas cinco da tarde cando sae listo do forno. Polo medio, unha vez que está todo o pan metido no forno e mentres esperamos, sentámonos e facemos un pouco de grupo degustando algún produto tradicional que se comía antigamente nas aldeas como os faragullos ou o caldo de restrido, unhas comidas que tamén me gustaría que se recuperasen. A iso das cinco da tarde quitamos as cousas do forno e a empanada probámola e comémola tamén alí entre todos, mentres que o pan repartímolo para levar”, sinala. A maiores, está preparando uns cursos máis orientados aos nenos e nenas.

Para levar a cabo estes cursos, Lourdes rehabilitou por completo o forno da súa casa. “Quero realmente que se volva facer pan como antes e animo a todo o mundo a apuntarse porque pasámolo realmente ben. Dáme unha alegría enorme que a xente veña, queira recuperar o modo tradicional de recuperar o pan e logo se faga unha festa. A verdade é que sempre o pasamos moi ben”, conclúe.

A Asociación Corripa levou a cabo o pasado mes de novembro unha plantación de árbores coa que quixo compensar a pegada de carbono producida polas Xornadas de Ciencia na Aldea celebradas no mes de abril previo. Desde o colectivo están moi concienciados con esta problemática e saben que organizar unhas xornadas destas características supón unha serie de desprazamentos en coche de moitas persoas que acaban xerando un impacto no planeta. Desde a organización de Ciencia na Aldea, calcularon a pegada de carbono xerada e puxéronlle remedio cunha plantación de árbores en Pena da Nogueira aberta aos seus socios, colaboradores e a calquera persoa interesada.

Ademais, desenvolveron nun documento esta guía práctica que lles pode servir como referencia a outras asociacións, colectivos ou organismos para levar a cabo estes cálculos e facelos dun xeito rápido e eficaz. Así mesmo, inclúe recomendacións á hora de executar a plantación de árbores.

A guía expón catro fases ou pasos principais para calcular esta pegada:

Información sobre a cantidade de emisións

O primeiro é obter a información da cantidade de emisións que se puideron xerar, onde entran dous factores principais. O que ten que ver coa viaxe dos participantes ata o lugar no que se desenvolva o evento. En función de se chegaron nun medio de transporte privado ou público ou se viaxaron en coche, bus, tren ou avión, a pegada será inferior ou superior. Tamén é fundamental coñecer a orixe de cada participante para calcular os quilómetros que tivo que acometer en cada medio de transporte. A outra cuestión ten que ver coas emisións por electricidade. Neste punto o máis básico é coñecer canta enerxía eléctrica se consumiu durante o evento e cal foi a orixe da xeración da mesma. 

Cálculo das emisións

Cos datos anteriores recompilados chega o momento de pasar ao seguinte paso que é o cálculo das emisións, no que contarán coa axuda dunha plantilla Excel.

Na guía tamén se expoñen unha serie de recomendacións para reducir as emisións xeradas durante o evento como promover o uso de transporte público, recordar a posibilidade de compartir un vehículo privado ou de alugar un vehículo eléctrico ou calquera outra opción que conleve o consumo de menos combustible, así como evitar os desprazamentos en avión, salvo que sexan totalmente indispensables. No tocante á electricidade, é importante valorar a posibilidade de utilizar iluminación ou equipos máis eficientes ou valorar a posibilidade de contratar enerxía eléctrica con certificado de orixe renovable, entre outras cuestións.

Cálculo das absorcións

O terceiro e penúltimo punto ten que ver co cálculo das absorcións. Cada especie arbórea ten un factor de absorción diferente e grazas a unha listaxe de especies podemos coñecer as emisións totais que se poden compensar durante 30 anos, tempo que se marca como referencia para o cálculo. Ao ir engadindo a cantidade de plantas de cada especie que se van a empregar na plantación, as emisións compensadas van subindo ata conseguir igualar ou superar as xeradas polo evento.

Recoméndase empregar especies autóctonas da zona e é preciso analizar o tipo de chan onde se van plantar, orientación, uso actual ou entorno inmediato, características claves para que a plantación chegue a bo porto. Na guía expóñense outras cuestións que poden axudar a conseguir a mellor plantación posible.

Plantación das árbores

Finalmente, o cuarto e último paso ten que ver coa propia plantación das árbores. A recomendación é intentar contar coa planta máis axeitada para o lugar, o permiso do propietario do terreo e conseguir todas aquelas autorizacións necesarias para executala, se estivese dentro dun monte de utilidade pública ou dun espazo protexido. Á hora de realizar a plantación plantexan contar con persoal cualificado ou realizalada no marco dunha xornada de voluntariado. Neste último caso terán que contar cos seguros necesarios e aportarlles o material preciso.

Este mes de febreiro, como non pode ser doutro xeito, pola montaña estamos adicados de pleno a preparar (e probar) cocido, butelos e androllas. Coma cada ano, empezamos ca Feira do Butelo da Fonsagrada (3 e 4 de febreiro) e collemos impulso coa Festa da Androlla de Navia de Suarna (11 de febreiro). Pero este ano, incorporamos ao calendario as Xornadas de Degustación do Cocido da Montaña; durante todo o Entroido poderá degustarse o Cocido da Montaña en varios restaurantes e casas de comida de todo o territorio e o 13 de febreiro, coincidindo co martes de Entroido, haberá unha gran degustación en Baleira.

Xornada Degustación Cocido da Montaña en Baleira

O pavillón municipal de Baleira prepárase para a gran Degustación do Cocido da Montaña cunha xornada de festa con actividades gastronómicas, música, sorteos e desfile de disfraces de Entroido.

As 13.45 horas abrirase o pavillón para as persoas que teñan entrada para a degustación. O prezo é de 15€ por persoa e inclúe o xantar, con cocido tradicional da zona, a bebida e unha sobremesa de doces típicos de Entroido. As entradas para a degustación poden mercarse de xeito anticipado nos seguintes establecementos que forman parte da Asociación de Hostalaría de Baleira: A Marronda, O Moneda, O Neireo e O Recuncho de Vane.

Ás 17.30 horas, unha vez rematada a degustación, a entrada ao pavillón será libre, e todas as persoas que se acheguen poderán participar no desfile de disfraces e desfrutar da música e a festa toda a tarde. Ao final deste artigo deixamos os carteis informativos do evento, onde podes atopar toda a información.

Degustacións en todo o territorio

Durante todo o Entroido, os restaurantes e casas de comidas dos 14 concellos que forman o noso territorio, estarán ofrecendo pratos de Cocido da Montaña. En canto teñamos confirmación, iremos subindo os establecementos e as localizacións onde podes degustar o cocido certificado de Cociña de Ancares Terras de Burón, con ingredientes da montaña certificados.

Restaurantes confirmados

Establecementos que ofrecerán Cocido da Montaña aos seus clientes durante o Entroido:

• A Marronda, Baleira. Teléfono 608 080 406
• Recuncho D’Vane, Baleira. Teléfono 618 966 710
• Casa do Chao, Villaverde, Navia de Suarna. Teléfono 680 275 490
• Casa Sidrón, Pieiga, Negueira de Muñiz. Teléfono 655 838 199
• O Neireo, Baleira. Teléfono 982 355 248
• Caserío Meiroi, Navia de Suarna. Teléfono 659 030 341
• Restaurante O Piñeiral, A Fonsagrada. Teléfono 606 165 752
• Fonda Zarralleiro, Baralla. Teléfono 608 589 735
• A Lareira, Chandevilar, As Nogais. Teléfono 636 648 174
• O Xegunde, Navia de Suarna. Teléfono 649 243 958
• Mesón Catro Ventos, Barbeitos, A Fonsagrada. Teléfono 982 340 151
• Restaurante Rivera, Becerreá. Teléfono 982 360 185
• Restaurante Boavista, Becerreá. Teléfono 982 360 853
• Apartamentos Sons do Eo, Murias, Baleira. Só para persoas aloxadas. Teléfono 663 612 833
• Restaurante A Escola, Navia de Suarna. Teléfono 982 365 251
• Restaurante O Cebreiro, O Cebreiro, Pedrafita do Cebreiro. Teléfono 982 367 182
• Mesón Aarau, Navia de Suarna. Teléfono 982 365 084
• Casa Cazoleiro, Meira. Teléfono 982 330 331

Tes un restaurante ou casa de comidas no territorio e queres sumarte a esta iniciativa? Ponte en contacto con nós no teléfono 659 275 743.

Produtores certificados

Ademais dos restaurantes e casas de comidas, descubre os produtores certificados co selo de ‘Cociña de Ancares Terras de Burón’:

• Cervexas Píntega.

Pasaporte Gastronómico

Tanto na Feira do Butelo da Fonsagrada, como na Festa da Androlla de Navia de Suarna, poderase selar o Pasaporte Gastronómico do Xeodestino Ancares Terras de Burón. Con cada selo, participa en saborosos sorteos. Non deixes de achegarte ao posto do Pasaporte Gastronómico e pedir o teu!

Na tarde deste xoves 25 de xaneiro presentamos no stand de Galicia en FITUR (Feira Internacional de Turismo) a campaña ‘Déixate Marabillar’, a proposta turística do Xeodestino para este 2024 coa que buscamos que os visitantes coñezan o noso territorio a través dunha serie de oito experiencias. O emprendedor local Carlos Díaz, que vén de crear a primeira axencia turística do territorio, Naviaventours, e o alcalde da Pontenova, Darío Campos, foron os encargados de conducir unha presentación que tamén incluíu un vídeo promocional sobre o Grupo de Desenvolvemento Rural Montes e Vales Orientais e o Xeodestino.

‘Deixate Marabillar’ ofrece a posibilidade de coñecer un Xeodestino integrado por 14 concellos da área da Montaña de Lugo a través da realización de experiencias que van desde aprender todo o proceso de elaboración do pan ou dos viños da Indicación Xeográfica Protexida Terras do Navia ata realización de distintos roteiros, xa sexa a pé, en bicicleta, en coche ou mesmo a cabalo.

Aqueles que se decidan a deixarse marabillar polo noso xeodestino coñecerán un territorio cunha beleza natural impresionante e cunha historia a nivel patrimonial, arquitectónico, cultural e etnográfico que pouco a pouco se está recuperando e dando o valor que ten. Así mesmo, poderán recorrer o xeodestino seguindo os pasos de todas as películas que se rodaron nas últimas décadas neste territorio, desde a máis recoñecida recentemente ‘O que arde’, de Óliver Laxe, ata outras más antigas como ‘A los que aman’, de Isabel Coixet, pasando por filmes como ‘Romasanta’ ou ‘Vilamor’.

Agasallo de produtos locais

A posta de largo de ‘Déixate Marabillar’ completouse cun agasallo da ‘Cociña de Ancares Terras de Burón’ para que todos os asistentes coñezan de primeira man os produtos locais que forman parte desta iniciativa gastronómica e tamén de ‘A Despensa de Ancares Terras de Burón’. Concretamente, recibiron un tarro de mel multifloral de Toxal Riba (Navia de Suarna) e un código desconto para empregar nas tendas en liña de A Carqueixa (Cervantes) e Son de Lugo (A Fonsagrada).

Ecoturismo como estratexia

A xerente do GDR Montes e Vales Orientais, Fe Álvarez, tamén asistiu á presentación e remarcou a filosofía coa que estamos traballando para a promoción do xeodestino. “Continuamos na nosa liña de apostar por experiencias de ecoturismo, tecendo lazos de colaboración para xerar propostas turísticas sostibles e de calidade que teñan dous pilares fundamentais como son o territorio e as persoas que viven nel”, sinalou Álvarez.

Así mesmo afirmou que “a nosa idea é ofrecer experiencias nos nosos espazos protexidos e naturais conseguindo que os que nos visitan tamén colaboren no desenvolvemento da cultura e a economía local, así como na conservación da natureza e a biodiversidade do territorio”, afirmou desde o stand de Galicia en FITUR.

É importante recordar que os 14 municipios que conforman este Xeodestino Ancares Terras de Burón suman case a metade da superficie Red Natura 2000 de toda a provincia e albergan tres das sete Reservas da Biosfera recoñecidas en Galicia.

Pasaporte Gastronómico

Fe Álvarez tamén sinalou que este ano apostaremos de novo polo ‘Pasaporte Gastronómico’, unha iniciativa que comezou en 2023 e que serve para dinamizar con actividades e sorteos 14 feiras e festas gastronómicas que se celebran no territorio. En cada un destes eventos, os viaxeiros poderán selar o seu pasaporte e rexistralo na web do Xeodestino para así poder entrar no sorteo dos premios que haberá en cada feira.

O calendario deste ‘Pasaporte Gastronómico Ancares Terras de Burón’ arrincará os días 3 e 4 de febreiro coa Feira do Butelo da Fonsagrada e poderá consultarse completo proximamente na web www.do Xeodestino.

A Casa do Chao, en Navia de Suarna, acolleu o martes 16 de xaneiro unha feira para seguir achegando aos establecementos turísticos da zona a iniciativa de ‘A Despensa de Ancares Terras de Burón’. O evento estivo organizado polo Grupo de Desenvolvemento Rural (GDR) Montes e Vales Orientais, en colaboración co Polo de Emprendemento e Apoio ao Emprego da Montaña, e estaba dirixido aos produtores agroalimentarios do territorio e responsables de establecementos turísticos, así como a persoas emprendedoras que puideran estar interesados en participar na iniciativa “Cociña de Ancares Terras de Burón”, empresas, entidades do eido turístico, responsables institucionais e prensa.

A feira foi unha nova xornada de traballo coa que dar a coñecer ‘A Despensa de Ancares Terras de Burón’, unha iniciativa que pretende tender pontes e xerar sinerxias entre o sector turístico e o agroalimentario para tecer unha rede colaborativa e así conseguir incorporar os alimentos e produtos que se producen na zona, tales como pratos xa cociñados, conservas, embutidos ou bebidas, aos establecementos turísticos que non dispoñen de cociña nas súas instalacións. Desta maneira, os visitantes que se hospeden nos locais do territorio que abarca o Xeodestino Ancares Terras de Burón, poden coñecer e acceder a distintos produtos de proximidade.

Nesta ocasión, diferentes produtores que xa forman parte de ‘A Despensa de Ancares Terras de Burón’ fixeron unha exposición e degustación dos seus produtos e explicaron que e como se produce no territorio, coa finalidade de seguir sumando empresas á iniciativa.

A feira, que deu comezo ás 12 do mediodía, contou co seguinte programa:

• 12h. Recepción e benvida de participantes
• 12.20h. Presentación dos traballos realizados no marco da iniciativa ‘A Despensa de Ancares Terras de Burón’, o estado actual do proxecto e as liñas de futuro. Esta presentación levarona a cabo Iván Sánchez, técnico do Polo de Emprendemento e Apoio ao Emprego da Montaña e Fe Álvarez, xerente do GDR3 – Montes e Vales Orientais.
• 12.40h. Reflexións sobre boas prácticas de colaboración entre axentes do territorio, emprendemento feminino e igualdade. Participaron Sandra Vázquez, Secretaria Xeral de Igualdade da Consellería de Promoción do Emprego e Igualdade; Margarita Ardao, Directora Xeral de Emprendemento da Consellería de Promoción do Emprego e Igualdade e a chef Lucía Freitas, que presentou o proxecto “Amas da Terra”.
• 13h. Exposición e degustación de produtos de ‘Cociña de Ancares Terras de Burón’. Networking entre participantes.
• 14h. Peche da xornada.

Desde o GDR Montes e Vales Orientais estamos moi satisfeitos co desenvolvemento do ‘Concurso Pintameles 2023’, xa que consideramos que foi un auténtico éxito de participación. É por iso que queremos amosar o noso agradecemento a todos os colexios que participaron nesta edición pertencentes aos concellos de Baleira, Becerreá, A Fonsagrada, Meira, Navia de Suarna, Pedrafita e A Pontenova. Estamos moi contentos coa implicación que demostraron os colexios, na figura dos seus mestres, e, sobre todo, o propio alumnado.

Deseños numerosos e de gran calidade

Durante a fase de recollida de propostas para ser o cartel oficial da Feira do Mel da Montaña deste ano recibíronse 205 deseños realizados polos nenos e nenas da zona, unha cifra espectacular que fala moi ben da importancia que ten este evento na contorna. Ademais, o xurado tivo un traballo moi difícil á hora de decidir cales debían ser os finalistas, dado que nesta edición houbo moita calidade nos debuxos e o alumnado da montaña demostrou unha vez máis que coñece a apicultura tradicional que se practica na zona.

Exposición no certame

A gañadora do concurso foi Carlota López Rego, alumna do Ceip Plurilingüe Santa María, de A Fonsagrada, a quen felicitamos desde o GDR. O seu deseño foi o que puidemos ver no cartel desta edición da feira, mentres que o resto de debuxos foron expostos no recinto no que se celebrou o certame de exaltación do mel local en Baleira.

A pasada semana recibimos a visita dos responsables de tres Grupos de Desenvolvemento Rural (GDR) polacos cos que estamos colaborando nun proxecto europeo baseado na apicultura e que tamén inclúe ao GDR Terras de Miranda, da Mariña.

Logo de estar do martes facendo distintas actividades pola comarca mariñá, os técnicos polacos tiveron o mércores unha xornada cargada de visitas na Montaña acompañados en todo momento pola nosa xerente, Fe Álvarez. Foron recibidos en Baleira polo seu alcalde, Ángel Enrique Martínez-Puga; na sede do propio GDR Montes e Vales Orientais; e de ali dirixíronse á Pena de Nogueira, en Negueira de Muñiz, para visitar o ecomuseo de El País del Abeyeiro, onde coñeceron o xardín de polinizadores Fernando Fueyo e o souto artístico de Humboldt. Alí mesmo, realizaron unha cata de meles.

Posteriormente movéronse ata A Fonsagrada, onde puideron desfrutar dunha degustación de produtos locais na sede da Asociación de Gandeiros da Fonsagrada (Asgafon), ao tempo que recibiron un agasallo composto de distintos produtos locais. No municipio fonsagradino tamén puideron coñecer o traballo que está desenvolvendo un apicultor que se está pasando á produción ecolóxica.

Conclusións e plans de futuro

Meira foi a última parada dos técnicos dos GDR polacos e dos equipos técnicos dos GDR lugueses. Logo de seren recibidos no Concello polo alcalde meirego, Antonio de Dios, levaron a cabo unha proveitosa sesión de traballo. Na mesma tiráronse varias conclusións do que significaron estas xornadas na Mariña e na Montaña, ao tempo que tamén se trazaron plans de futuro, xa que a cooperación entre os cincos GDR seguirá nos próximos meses. A xornada completouse pola tarde cunha visita guiada a Meira.

Feira do Mel da Montaña

Esta actividade cos GDR polacos e o das Terras de Miranda está encadrada dentro da Feira do Mel da Montaña, que chega á súa sexta edición este ano e cuxos días centrais se celebrarán en Baleira os vindeiros venres 20 e sábado 21 de outubro. O programa do venres arrincará cunha xornada técnica, a partir das 16 horas, na que os asistentes aprenderán a catar e a conservar o mel. Tamén haberá un obradoiro de conservas con mel. Máis tarde, desde as 20 horas, terá lugar un magosto popular con castañas, outras larpeiradas e música.

O sábado 21 é o día onde se desenvolve a feira, que se abrirá ás 10 da mañá e contará con múltiples actividades e cos postos de venda e exposición dos apicultores da montaña. Ás 11 levarase a cabo unha cata, ás 12 do mediodía será a quenda para as músicas do ciclo do ano e ás 13 horas haberá unha degustación da cociña de Ancares-Terras de Burón. Pecharase a feira coa entrega de premios do II Concurso de Mel de Montaña, o sorteo do Pasaporte Gastronómico Ancares – Terras de Burón e música popular.

Aberto o prazo para ser expositores

Aqueles produtores e produtoras de mel ou produtos artesanais e gastronómicos interesados en participar na sexta Feira do Mel da Montaña poden anotarse aínda chamando aos teléfonos 982.35.52.90 ou 659.27.57.43.

Andaina de interpretación ambiental

O programa desta sexta edición da Feira do Mel de Montaña pecharase a tarde do sábado 21, a partir das 16 horas, cunha andaina de interpretación ambiental pola fraga da Marronda. Os participantes farán unha ruta circular duns seis ou sete quilómetros por un espazo dunha beleza espectacular e no que coñecerán a súa flora.

Esta martes participamos no Pazo de San Marcos de Lugo nunha xornada divulgativa na que se presentou o proxecto do Túnel de Viños, unha iniciativa subvencionada pola Cooperación LEADER na que participan seis Grupos de Desenvolvemento Rural (GDR) de toda Galicia e que ten por obxectivo dar a coñecer os viños de diferentes Indicacións Xeográficas Protexidas (IXP), poñer en marcha un polígono vitivinícola en cada territorio e potenciar o enoturismo.

No acto, celebrado na sala de exposicións da sede da Deputación de Lugo, estivo presente a nosa xerente, Fe Álvarez, acompañada do deputado provincial de Promoción Económica e Social, Pablo Rivera Capón; do concelleiro de Cultura da Fonsagrada, Silbán Rodríguez Palmeiro; de Manuel, en representación do Concello de Navia de Suarna; e as adegueiras de Negueira de Muñiz e Navia de Suarna. Esta xornada divulgativa contou cunha clase maxistral pola mañá, a cargo dos expertos enólogos Luis e Alejandro Paadín, mentres que os asistentes puideron desfrutar na sesión vespertina dunha cata dirixida por Martiño Santos.

Dar a coñecer os viños da IXP Terras do Navia

Este proxecto do Túnel de Viños e as actividades que leva aparelladas buscan acadar un obxectivo triplo. Por un lado, o primeiro é dar a coñecer os diferentes viños que se producen nos territorios participantes. No noso caso trátase das variedades incluídas na IXP Terras do Navia e que se cultivan nos concellos de Negueira de Muñiz, A Fonsagrada e Navia de Suarna. Concretamente son o albariño, caíño branco, loureira, godello e torrontés, no referente aos brancos; e o albarín tinto, mencía, brancellao, merenzao, caíño tinto e loureiro, respecto aos tintos.

Mobilización de terras para facer polígonos vitivinícolas

A segunda liña de traballo deste proxecto cooperativo é conseguir a mobilización de terras para intentar que en cada territorio se faga un polígono vitivinícola, o que axudaría a crear riqueza nas respectivas zonas e tamén postos de traballo.

O viño como un reclamo para atraer un turismo de calidade e sostible

Finalmente, o terceiro obxectivo é potenciar o enoturismo, é dicir, o turismo ligado ao viño. A IXP Terras do Navia parte con vantaxe neste tema, xa que conta cun potencial moi grande para desenvolver actividades relacionadas co enoturismo nun territorio no que hai dúas Reservas da Biosfera, así como varios espazos protexidos pola Rede Natura 2000. Esta meta tamén serviría para poñer en valor a cultura vitivinícola dos Montes e Vales Orientais buscando un turismo de proximidade, de calidade, non masificado e totalmente sostible.